An istorya kan buhay ni Senadora Leila de Lima kan nakaaging anom na taon, puon kan Pebrero 2017 kan siya kinasohan, binastos sa kongreso asin ipinapriso kan rehimen ni dating Presidente Rodrigo Roa Duterte, istorya nin kun pano ginibohan kan gobyerno nin kasong kriminal an sarong tawo na kritiko kan presidente.

Aram kan kadaklan kun tano napripriso si de Lima. Napag-initan lang siya kan dating presidente na si Rodrigo Duterte – sarong tawo na sa hiling ko may pagka binggatibo.

Kan si de Lima an namamayo kan Commission on Human Rights (CHR), pina-imbistigahan niya an mga extrajudicial killings sa Davao City, kun sain si Duterte an alkalde kan siudad. Dara kaini, mayong delikadesa na nagpromisa si Duterte na pababayadon niya si de Lima sa ginibo kaini.

Maski kan nasa senado na si de Lima, pina-imbistigahan niya an mga extrajudicial killings na resulta kan kampanya kan gobyerno ni Duterte laban sa droga.

Risang marhay na napikon si Duterte, nasuya asin naanggot sa sarong babae na dai takot isapubliko an mga nangyayari sa laog kan saiyang administrasyon, lalo na pagabot sa mga pagabuso kan karapatan pantawo (human rights).

Tinutuo ni Duterte an saiyang promisa o patanid na pababayadon niya si de Lima. Kinasohan si de Lima kan gobyerno na inbwelto daa siya sa pagbenta nin mga ilegal na droga (illegal drug trading.)

Saro sa mga aligasyon kontra ki de Lima iyo an pagresibi niya nin P10 milyon, kan siya an namamayo kan  Departamento kan Hustisya (Department of Justice o DOJ), sa sarong opisyal kan Bureau of Corrections (BuCor) na si Rafael Ragos. Segun sa gobyerno, gagamiton na pondo ni de Lima an P10 milyon sa pagkampanya niya sa pagka-senador kan 2016. Pinaluwas na hali an kwarta sa mga drug lords sa laog kan New Bilibid Prison (NBP) na may karibay na politikal na pabor.

Nagkaigwa man ngaya nin pagdangog sa kongreso (congressional hearing) kan kaso ni de Lima. Pero an nangyari binaboy asin pinag-piyestahan lang an pagkababae ni de Lima kan mga kongresista o deputado na huna mo baga malilinig an mga kalag. Sa totoo lang, aram kan mga namamanwaan na an tuyo kan si pagdangog sa kongreso raoton an reputasyon ni de Lima.

Segun ki Mark Beeson, propesor nin international politics sa University of Western Australia, an imbestigasyon ki de Lima “is another effort to close down criticisms of (Duterte’s) administration.”

An dai aram kan mga tawong kalaban ni de Lima sa politika, si de Lima sarong tawo na may prinsipyo, may dignidad, maka-Dios asin dai takot sa mga tawong mapang-api. Dai siya natakot labanan sa legal na paagi an mga kaputikan asin kademonyohan kan saiyang mga kalaban sa politika.

Sa laog nin anom na taon na siya napripriso, dai siya nawaran nin paglaom na maabot an aldaw makukua niya an hustisya na mayong takot niyang ipinaglalaban sagkud ngonian

May kasabihan sa Ingles na: “No matter how long the winter, spring is sure to follow.”

Kan Pebrero 17, 2021, ginana ni de Lima an inot niyang kaso manunungod sa partisipasyon niya sa pagbenta nin mga droga.

Kan nakaaaging Mayo 12, 2023, pig-abswelto si de Lima kan Muntinlupa Regional Trial Court Branch 204 sa saro niya pang kaso kan bawion ni dating BuCor OIC na si Rafael Ragos an testimonya niya laban ki de Lima. Segun ki Ragos, pinirit lang siya ni Vitaliano Aguirre II, na dating sekretaryo kan Departamento kan Hustisya (DOJ) ni Duterte, na magtestigo laban ki de Lima.

Tolo gabos an ikinaso kan rehimen ni Duterte ki de Lima na inbwelto siya sa ilegal na pagbenta nin mga droga (illegal drug trade) sa laog kan New Bilibid Prison. Duwang kaso na an iginana ni de Lima. Sarong kaso na lang an dai pa nadedesisyonan kan korte.

Dikit-dikit ng nagluluwas an totoo. Kadikit na panahon na lang, siguradong an biktima kan rehimeng Duterte na si Senador Leila de Lima makukua na an hustisya.

An pagtios na inagihan ni de Lima kan nakaaging anom na taon nagpapahiling na mayong laban ang kaputikan sa katotoohan.

Isinabuhay ni de Lima na dai siya mapadaog sa pwersa asin pang-aabuso kan gobyerno, maski sa Korte Suprema na kun sain siyam na huwes an nagboto na siya prisohon.

Ipinahiling ni de Lima sa gabos na mga Pilipino na an hustisya ipinaglalaban, dai ini nahuhulog hali sa langit.

Biktima man si de Lima kan mga politikong inabuso an saiyang pagkatawo, sa katapusan, an ipinaglalaban niya bako lang an saiyang personal na interes, kundi an interes kan mga Pilipino, lalo na itong mga nagin biktima o magigin biktima kan mga poderosong politiko na maraot an pagkatawo.

Para sakuya, si Leila de Lima sarong Bikolana na may pagka Gabriela Silang: Dai takot ipaglaban an tama.

(Featured image: Manila Times, photo by Rene Dilan)